Amayezi
Amayezi awuhlobo lwamafu aphezulu akhiwa imincwebe yeqhwa. Amayezi avama ukubonakala ensokonsoko enemicu emhlophe. Amayezi avame ukwakheka lapho umoya ofudumeleyo, nowomisileyo ukhuphuka, udala ukuzikiseka komhwamuko wamanzi ezinhlayiyeni zothuli olusankimbi noma olusamatshe esithikilini sesibhakabhaka. Emhlabeni, akheka phakathi kwamamitha ayizinkulngwane ezine (4,000) nezinkulungwane eziingamashumi amabili (20,000) phezu komthebelele wolwandle.
Amayezi akheka kusuka eziqongweni zeziphihli nezezishingishane futhi kwezinye izikhathi abikezela ukuza kwemvula noma iziphihli. Nakuba ewuphawu lokuza kwemvula neziphihli, amayezi nawo ngokwawo akhithikisa uhoyana lwemincwebe yeqhwa. Le mincwebe iyahlaphazeka, incibilike, futhi ihwamuke lapho ikhithika idlula emoyeni ofudumele nowomisileyo futhi ayifiki nokufika phansi. Amayezi yiwona afudumeza umhlaba. Umhlaba ofudumalayo uzogcina ukhiqiza amanye amayezi engeziwe, nokuzigcina kungumazinkintshela ozifakelelayo.
Izimongotho zokukhanya ezifana nemiqhele, zikhiqizwa ukukhanya lapho kunanana nemincwebe yeqhwa emayezini. Kukhona ezinye izinhlobo zamafu ezimbili zesigaba esiphakeme ezibizwa amayezenaba kanye namayezecuya. Amayezenaba abonakala ngathi awukhethe lwamafu, kuyilapho amayezecuya efana nesifanelo sezigaxana zamafu. Ngokuphambene namayezi namayezenaba, amayezecuya aqukethe amaconsi wamanzi akhazisiweyo.
Amayezi ayakheka nakumoyambulunga kaNotshezi, iNdonsa, uNomaxhama, uNomakhekheba nakuNolundwa. Ezinye izinhlobo zalawa mayezi zakhiwa iqhwa lomthundohwe noma lejawani, njengeqhwa lamanzi elakha amayezi kuNomkhubulwane. Ezinye izinhlobo zamafu wenqeke emkhathini zakhiwa izinhlayiyana zothuli, nazo zibizwa ngokuthi amayezi.
